Knaken

Knaken ligg i den gamle sauefjøsen til Kaupanger Hovedgård. Gardsanlegget, saman med Kaupanger stavkyrkje, er freda og er definert som eit unikt kulturmiljø i Noreg. Garden har i over 300 år vore eigd av familien Knagenhjelm. Området har særs spanande historie å by på, ikkje berre ligg ein av få attverande stavkyrkjer her, men historisk opplevde staden å vekse frå ein førhistorisk gardsbusetjing til å bli den einaste byen i Sogn og Fjordane i mellomalderen. Garden har vore eigd av kongen og vore sete for ein av tidenes verste danske futar, sentrum for administrasjonen av Indre Sogn på 1700-talet og adeleg setegard. Ta turen til Kaupanger og opplev dei arkeologiske spora etter jernaldergarden, mellomalderbyen og tusen år lang tradisjon i bruk av tømmer, båtbygging, og ikkje minst ei vakker stavkyrkje!